Hunsa, forðast, fyrirgefa: Sýn barna á árekstra vina og grósku- og festuhugarfar í vináttu

Útdráttur

Styðjandi og traust vinatengsl draga úr einmanaleika og ýta undir félagsfærni. Gagnlegt er að skilja hvernig börn hugsa um vináttu og ágreining í vinasamböndum til að unnt sé að hlúa betur að þessari færni. Rannsóknir gefa til kynna að gróskuhugarfar gæti aukið getu barna til að mynda vináttu og leysa ágreining vina. Markmið rannsóknarinnar var að varpa ljósi á sýn og reynslu barna af vináttu og lausn ágreiningsmála. Rannsóknin beindist að grósku- og festuhugarfari og hvernig það skapar leiðir til að takast á við hindranir og árekstra á sem uppbyggilegastan hátt eða ýtir undir frekari árekstra og hindranir. Tekin voru níu rýnihópaviðtöl við samtals 22 börn í fimmta, sjötta og sjöunda bekk. Notast var við markmiðsúrtak. Gögnin voru þemagreind en niðurstöður voru þær að meirihluti barna sem tóku þátt virtist hafa ríkjandi gróskuhugarfar gagnvart vináttu. Ef börn mátu vináttu verðmæta fyrirgáfu þau frekar mistök og báðust fyrirgefningar í kjölfar ágreinings. Festuhugarfar birtist helst í að sum barnanna beittu hefnigirni og refsingum eftir árekstra og slitu vináttu ef ágreiningur var ítrekaður. Þau börn sem nutu ráðgjafar og stuðnings foreldra sýndu meiri færni í að leysa ágreining og virtist gróskuhugarfar ríkara hjá þeim en þeim sem nutu síður leiðsagnar foreldra. Vonast er til að niðurstöðurnar auki skilning á hlutverki hugarfars í vináttu og félagatengslum barna, svo hægt sé að aðstoða þau að mynda og viðhalda vinatengslum og auka með því farsæld sína.